Nigeria - #EndSARS: Abagore batangije imyigaragambyo basabye abantu kuguma mu rugo

Imyigaragambyo muri Nigeria
Insiguro y'isanamu,

Abigaragambya bamaze ibyumweru bibiri basaba impinduka mu gipolisi

Ihuriro ry'abaharanira ijambo ry'umugore, ryagize uruhare rukomeye mu gutangiza imyigaragambyo yiswe #EndSARS, ryasabye urubyiruko rwa Nigeria kuguma mu rugo rukubahiriza umukwabu wategetswe na leta zo muri iki gihugu.

Iri huriro ryavuze ko ritazongera kwakira impano rihabwa z'ibikorwa byo kwigaragambya.

Muri Nigeria hamaze iminsi imyigaragambyo ikomeye yageze aho abashinzwe umutekano barasa bakica abayirimo, abayikora nabo bagasenya inyubako zitandukanye za leta.

Ibyasabwe n'iri huriro birabonwa na benshi nk'iherezo ry'iyi nkubiri y'imyigaragambyo, yashegeshe Nigeria mu buryo bukomeye cyane.

Iri tangazo ryatanzwe hashize amasaha atanu Perezida Muhammadu Buhari aburiye urubyiruko ngo ruhagarike imyigaragambyo kuko iteje akaga umutekano w'igihugu kandi bitaza kwihanganirwa.

Iri huriro riharanira imbaraga n'ijambo ry'abagore, rivuga ko ryakiriye impano ya $400,000 (hafi miliyoni 400Frw) avuye ahatandukanye ku isi. Kandi ko menshi muri yo atarakoreshwa.

Rivuga ko riteganya kugabanya aya mafaranga mu bikorwa byo kuvura abakomeretse, ibijyanye n'amategeko, no ku miryango y'abiciwe ababo muri iyi myigaragambyo ya #EndSARS.

Mu itangazo rindi ryatanzwe n'uhagarariye Amerika muri Nigeria, ryavuze ko ku wa kane bahuye na visi perezida wa Nigeria Yemi Osinbajo bakamubwira impungenge batewe n'ibiri kuba.

Iri tangazo ryamagana ko ku wa kabiri ingabo za Nigeria zakoresheje imbaraga z'umurengera zikarasa ku bigaragambya i Lagos.

Ingabo, mbere zari zahakanye amakuru ko zarashe zikica abigaragambya, ziyita "amakuru y'ibinyoma" ("fake news").